些路迪請來韋費特南斯接任｜奧尼爾功成身退獲掌聲送別！些路迪正式宣佈從哥倫布機員挖角，請來法籍教頭韋費特南斯（Wilfried Nancy）接任領隊，取代臨時執掌嘅奧尼爾。後者交出7勝1負嘅亮眼成績，功成身退，獲全場球迷起立致敬。羅渣士辭職後，73歲老教頭奧尼爾臨危受命，帶領些路迪於國內賽事全勝，包括5場蘇超以及蘇格蘭聯賽盃4強淘汰格拉斯哥流浪，協助球隊晉身決賽。即使喺歐羅巴聯賽賽場，戰績亦錄得1勝1負，表現可圈可點。奧尼爾曾於2000至05年執教些路迪，今次重出江湖再掌兵符，距上次執教工作已有6年半。周三領軍小勝登地1-0後，佢笑言：「我要將呢套運動服帶走，仲未同球衣管理員講，不過我一定要留嚟做紀念！」至於新教頭韋費特南斯，將與些路迪簽下兩年半合約。佢曾帶領哥倫布機員奪得2023季後賽冠軍及2024美職聯賽盃冠軍，更榮膺MLS年度最佳教練，今次登陸蘇超勢為球隊注入新活力。 🏴
