費林明高繼上星期捧南美自由盃冠軍後，上場巴甲主場以1比0擊敗施亞拉，提早1輪成為聯賽盟主，今年6月由阿仙奴加盟該會嘅中場佐真奴費路，短短半年連奪兩項重大錦標，呢位33歲老將雄心壯志，希望重返意大利國家隊踢世盃QF，協助球隊爭奪決賽周席位。佐真奴費路為費林明高各項賽事上陣29場入4球及3次助攻，相比效力阿仙奴2季半僅入2球，可以話係脫胎換骨。巴西媒體《ge.globo》早前指意大利國家隊主教練加圖素考慮重召佐真奴費路，佢亦渴望再次為「藍衣兵團」效力。佐真奴費路屬於意大利捧2021年歐國盃冠軍功臣，但上屆世界盃QF成為罪人，主場對瑞士生死戰，最後時刻射失12碼，導致未能取得直接出線資格，最終喺附加賽出局，佢亦逐漸淡出國家隊，已超過1年冇入選。隨住佐真奴費路回勇，加上意大利現時人才凋零，加圖素有可能徵召佢踢附加賽，亦係佐真奴費路將功補過好機會。佐真奴 足球L心水台
