【On.cc】泳兒拍拖逾10年談婚期 感情昇華中：不會瞞婚歌手泳兒、黃妍、黃淑蔓、張馳豪、鍾柔美、詹天文、林智樂、黎展峯、黃明德、曾傲棐、力臻、安俊豪、林芊瑩、陳柏宇及XiX等今天（14號）齊出席新城知訊台主辦「我們的大熱唱2025」拉票活動。泳兒技驚四座。泳兒推出了3首歌曲，全數均電台上榜歌，泳兒表示推出暗黑歌曲計劃後，因她的感情生活較簡單，又是愛恨分明之人，遇到不合適的人便會推卻，不想浪費時間，所以曾怕唱歌情，與髮型師男友拍拖逾10年，經歷過吵架及疫情，問到何時結束單身身份？她要求大家給予時間，因雙方也很忙，而感情一直昇華中，但一定不會瞞婚，她說：「我唔會遮遮掩掩，曾樂彤都逼我結婚，可惜佢結婚嗰日拋花球時我未到場，哈哈！」泳兒被問到可有留意近日陳湛文為選秀節目出任44強評判時，好評語遭電視台刪剪，但負評全數播出才遭網民鬧爆？她表示沒有留意，覺得播放時間有限，所以她擔任評判在錄影節目時，身邊同事為她拍片，讓想看花絮的觀眾能睇到，她說：「擔任評判，有啲大家私底下睇唔到嘅情況，我都會剪出嚟，節目播放時間有限，要面對大量素材就需要取捨，唔係剪片嘅人或唔係負責節目嘅人就唔會理解，（拍片為自己保障？）唔係，只係分享較深層嘅事，有時我教學時，學員有幾努力，大家未必全見到，我請外援幫忙，大家又未必見到，所以可以剪啲片出來嚟多謝佢哋。」另外，《This is Our Stage聲秀畢業演唱會》早前取消演出，泳兒表示音樂會不是取消，只是延期至明年1月中。同場「聲夢歌手」鍾柔美（Yumi）和詹天文為角逐「新城勁爆頒獎禮2025」的獎項進行拉票。現於廣州星海音樂學院升學的Windy表示學校沒有聖誕假期，現時又是考試期，同時要兼顧演藝工作都擔心兩者受影響：「我考完試又要落番嚟做嘢，做完嘢又要返去考試，都比較忙同埋辛苦過平時上堂，因為考試要考跳舞，又需要做啲簡報同埋需要同啲小組組員練舞，同埋仲要考無伴奏合唱，所以我好擔心工作而拖累咗考試，要盡量夾時間去練。」問到兩人將偕姚焯菲(Chantel)於本月28號假佛山舉行《TIME TO CYA》巡迴音樂會，問可擔心沒有時間綵排？Windy表示Chantel於22號歸隊，將會進行一次總綵排唱歌，但可能要做騷時先可以踩台，Yumi則說：「其實上次廣州都係咁，我哋突然收到冇dancers，只靠我哋3個去跳，我哋有個medley跳得好勁嘅，都係由我去教佢哋動作同企位，練幾次就ok，我哋都好熟，所以都習慣咗呢種模式，可以練一次就立即上台表演。」Yumi在港讀大學，開心終於有假放，她說：「考試就快完，拍緊嘅《飛常日誌II》喺年尾都拍完，依家就趕拍埋啲場口，（你好大黑眼圈，）係呀，我好攰，我尋晚4點幾拍完一場，今朝又嚟呢個活動，瞓咗兩個鐘。」Windy則安撫眼圈是臥蠶乃可愛象徵。問到拉票行動，Windy話很滿意今年成績，共推出4首歌，而《一切都是有原因的》打入「新城勁爆歌曲」20強，而Yumi就推出了一首《不欠你一個朋友》，她說新歌一別以往的跳唱風格，屬抒情慢歌，希望外界可以看見她感性一面而投她一票。另外，歌手黃淑蔓自言今年比去年有進步，明年會以衝女歌手獎作為目標，她說：「為自己定高啲嘅目標，若然真的達標就是超出預期。」她原定聖誕節的工作受大埔火災影響而取消了，令她有更多時間休息及減肥，由於運動挑戰計劃是配合12月中推出唱片，現唱片延期至明年二月推出，她的運動挑戰計劃也要延至明年二月，她稱：「依家每天做很多唔同類型運動，網球、單車、籃球及跑步等，（游泳？）以前好鍾意游水，（有冇泳裝相分享？）我有貨，要問公司畀唔畀我公開先，我啲泳衣照好正，有基本嘅比堅尼同埋運動型泳衣，但我實力派，唔想啲焦點放喺我外表上，（派泳照福利可吸粉？）我把聲已經好吸引，我個樣子又甜美，畀到粉絲甜頭，哈哈！」她表示預告水着look明年夏天可出爐，問屆時可能會反彈影響泳衣照美感？她即肯定地說：「一定唔會反彈，我唔會畀呢件事發生，經理人聽到直頭是「姨媽笑」，（定姨母笑呀？）姨母笑，哈哈！」而歌手黃妍談及她有5首歌角逐獎項，跟李幸倪一樣5首歌，兩人平分春色，她表示今年是默默耕耘年，所以會默默唱好歌，讓外界愛上她的作品，亦感謝幕後團隊為她度橋宣傳，同時多謝歌迷支持：「每出一首歌佢哋就學，我走嗰個Tour有10個站,包括倫敦，荷蘭同日本等，估唔到有兩位香港粉絲由倫敦跟到嚟荷蘭，當地人好感動，因為好少機會聽到廣東歌，呢個Tour啱啱完咗，最難忘就係日本尾站，係好感動喊到傻咗咁。」問到可有留意中日關係緊張？她就話：「冇留意，冇理到，交由同事去處理，都覺得ok嘅，因為音樂是文化交流。」至於工作可有受大埔火災影響？她覺得火災影響心情而難專心工作，生在這城市，不停看新聞也覺得辛苦，曾跟填詞人說雖然未必是受災者，但都覺得不開心，所以就創作了一首歌幫大家打氣，利用兩日時間創作了《急救學》這歌曲為大家修補情緒，不過只在網上分享。泳兒狀態極佳。鍾柔美（左）和詹天文實力擔當。XiX勁歌熱舞。黃妍人氣高踞不下。黃淑蔓表現出色。黃洛妍使出真功夫。林智樂獻唱繞樑三日。張馳豪發揮超水準。陳柏宇技高一籌。
