【On.cc】郭柏妍全力以赴 孖游嘉欣面試《魔音女團》
無綫選秀節目《魔音女團》正式啟動，今午面試邀來50位女藝人參加，當中包括郭柏妍、游嘉欣、倪嘉雯、倪樂琳及莊子璇等等。「魔音之首」郭柏妍與好姐妹游嘉欣參與《魔音女團》正式面試前受訪。談到被指是入圍大熱之選，尤其郭柏妍被介紹上台時，台下歡呼聲不絕，郭柏妍笑說：「我都受寵若驚。（有跟老師學唱歌做準備？）有，之前嘅教訓令我覺得有需要，跟謝東閔學。（覺得有改善？）咁要留番俾觀眾評價。「有信心洗脫魔音之名？）有信心，但要靠大家去引證。（覺得可以憑啲咩成團？）靠我嘅努力囉。（跳舞係咪好厲害？）都唔係好得㗎，但我有信心呢個節目可以訓練到我哋。」
郭柏妍（左）孖游嘉欣面試《魔音女團》。
游嘉欣表示今日面試點前，僅靠自己在家操練，又透露自己求學時入過舞蹈組：「不過都需要人教，如果freestyle就有啲難度。其實一班女仔一齊表演好有團隊感，好多年前《後生仔傾吓偈》都試過成班一齊表演跳舞，都已經feel到好有團魂，好團結，真係幾開心。」郭柏妍亦認同：「台慶我同游游都合作過歌舞表演，當時感覺期待又有趣。」
今午記者會上素有評審經驗的陳潔靈及陳奐仁也大感頭痛，陳潔靈直言：「個個等同白紙，唔識唱歌、唔識跳舞又唔識Rap，但要喺咁短時間內個女團喎，我真係唔識做，所以同製作團隊講唔好玩啦！」陳奐仁即補充：「攣都拗番直、死都拗番生係我哋嘅精神。大家（參賽者）放開嚟或者會做好好啲，老弱殘兵搏一搏就得。今次真台上1分鐘，台下好陰公，大家一齊陰公啦！」
而蕭正楠擔任節目主持，陳潔靈及陳奐仁擔任「班主任」，冼靖峰及黃洛妍則擔任助教。其實早於8年前無綫已試過於旗下音樂品牌選拔5位港姐，以跳唱形式組成女團重新演譯《到此一遊》，成員包括黃心穎、蔡思貝、馮盈盈、邵珮詩及張寶兒，5女更在《勁歌金曲》現場跳唱，影片至今累積過百萬點擊，可惜如今只剩馮盈盈仍留守無綫，令人唏噓。
蕭正楠台上大膽打趣：「點解搵我？「魔音」一定聯想到我太太啦！」但當下受訪即褪軚：「係監製話佢係魔音鼻祖，如果叫佢嚟唱一part，相信係對所有學員嘅鼓勵，但其實喺我教導下，翠如真係進步咗好多，佢都係我演唱會做過嘉賓。」他又趁機放閃：「其實認定咗終身伴侶後，我好耐冇睇過女仔嘞，但呢個節目要不停睇喎。（邊個令你最有印象？）名都唔記得，但頭先有一個話自己好有信心唱得好難聽，話佢爸爸成日叫佢唱卡拉OK，佢好想公開話俾爸爸聽佢其實唔得㗎！不過你今次睇唱歌、睇跳舞、甚至睇外貌，可能總有一part會中，有咁多女同事一齊，會擦出好多火花。」
冼靖峰即補充：「其實女同事私交甚篤，好清楚對方嘅弱點，然後攞出嚟表演，講俾大家聽反而係自己嘅強項。（咁有機心？）鬥心啫！」蕭正楠則指除「魔音之首」郭柏妍外，亦有留意「聲秀」兩名混血兒穎喬及喬美莎，覺得兩人跳舞非常出色及到位，自信滿滿，他又舊事重提：「咁我都係歌唱比賽出身，要好多謝陳潔靈老師，多咗佢教我唱歌，幫我贏咗個比賽，又推薦我去唱片公司，真係改變咗我嘅人生，今次勾返我好多回憶。」冼靖峰笑着回應：「咁你都改變到我人生，我細細就聽你唱歌同睇《巨輪》。」蕭正楠回他：「有咩咁出奇？拍劇我夠演過你老竇啦，頭先有啲參賽者係我入咗無綫佢都未出世！」
另外，提到被指工作量減少，有被雪藏之嫌，冼靖峰回應：「應該留番觀眾評價，但相信大家會見到我嘅狀態，淨係呢個段節目我都有排忙，監製叫我幫手留意啲女仔嘅情緒，要確保表演效果滿意先得。」
郭柏妍全力以赴。
游嘉欣狀態大好。
冼靖鋒有被雪藏之嫌。
蕭正楠大放笑彈。
陳潔靈
陳奐仁
