比賽鬥到最後一剎那！近九場聯賽狀態最好、攞分最多嘅球隊對碰，兩隊各有踢得好嘅時間，各有唔同針對性嘅部署，最後尾勝負都決定喺細節同際遇上。卡殊今屆球會級別入咗4球，國家隊入咗2球。而維拉今季聯賽後備球員貢獻咗9個入波加助攻，係整個英超相關數據第二多嘅。奧迪加特今場幾次遠射質素都唔錯；艾斯同奧迪加特嘅合作，暫時成效一般。雙方幾位中場迪勤懷斯、泰利文斯同麥真恩都表現出色。阿士東維拉近10場英超贏咗9場（只係輸利物浦），季初試過喺降班區域，如今已經排名第三，距離阿仙奴只有三分。射入絕殺嘅般恩迪亞- 「BUENDIA」，名字喺西班牙話係美好的一天嘅意思。田中 碧入開有條路，今次更加射入絕平嘅入波，論近期嘅日本國腳佢應該係最hot嘅一位。利物浦嘅問題始終未有得到解決，雪上加霜係沙拿賽後針對球會以及主教練史諾嘅言論似乎係傷口上灑鹽。「非洲國家盃開幕我好快就要離開晏菲路球場兼且同球迷講聲再見先，我唔係太清楚我喺呢度嘅未來會點。」當然呢度只係好概括嘅一段，事實上佢賽後嘅大篇幅言論或會激起千層浪，到底最後會得到一個咩結果，就真係有請下回分解。曼城只係允許維拉坐咗唔夠三個鐘榜眼位置就即刻搶返來，「黑馬」辛德蘭作客似乎完全唔係對手，左閘奧尼恩（Luke O'Nien）後備入替7分鐘更即變「紅牌阿姑」。送上兩次助攻嘅查基（Rayan Cherki）賽後被哥迪奧拿更被稱讚係「天使與魔鬼嘅化身」，「有陣時你會好鬼鍾意佢，有陣時你又真係好鬼憎佢，佢永遠就係咁特別嘅一位。」英超第15週賽事賽果-阿士東維拉2-1 阿仙奴曼城3-0 辛德蘭紐卡素2-1 般尼托定咸熱刺2-0 賓福特愛華頓3-0 諾定咸森林般尼茅夫0-0 車路士列斯聯3-3 利物浦白禮頓🆚韋斯咸（稍後時間進行）富咸🆚水晶宮狼隊🆚曼聯 🏴
