娛圈單打︱咁索都會畀仔撇 家陣真係世界變
TVB最索花旦張曦雯（Kelly），忽然宣布跟拍拖8年嘅有米外籍男友分手，震驚一眾花生友！皆因Kelly早就登堂入室，同男友共賦同居，外界以為佢哋坐定粒六，拉埋天窗實食冇黐牙，點諗到分手分得咁突然！嗚嗚嗚，十全十美嘅女仔都會畀仔飛，世界變咯！
有冇搞錯呀？明明早前Kelly先至話，男友雖然未正式開口求婚，但如果自己攞到演技獎，可能會反過來向男友求婚，擺明視對方為結婚對象，甜到痹！豈料事情在短短時日竟然大反轉，Kelly突然清空社交網跟男友嘅甜蜜合照，仲互相取消關注。其後終於承認，跟男友和平分開已有一段時間，目前身在美國療傷，強調「現在很好」，感謝大家關心。
點講都係難以置信囉，除非個男人盲咗啫，否則Kelly入得廚房、出得廳堂，點睇都冇可能畀仔撇。何況Kelly既有女性化嘅外表，又有「麻甩仔」嘅一面，最愛同男友一齊打機！幾多連登仔恨到流晒口水！咁好嘅絕世女友去邊度搵呀？
唉，都話人心冇厭足，男人尤其講求新鮮感，無論女朋友幾索都好，一齊耐咗，可能就會冇晒激情。佢哋同居都有一段時間，Kelly進駐男友位於北角嘅3,000萬元豪宅，不時以女主人嘅姿態呼朋喚友上門玩樂。大家以為佢哋打風都打唔甩，可惜結局令人無奈。
唔緊要啦，Kelly條件咁好，有樣貌有學歷有身材，心地善良，事業又正在起飛，簡直大把前途，裙下之臣由筲箕灣排到沙頭角都排唔晒，慢慢揀都仲得。祝福Kelly早日搵到真命天子！
張曦雯重投市場，相信不少男生已蠢蠢欲動。
