专访｜夏韶声曾穷到裤袋得七蚊，凭《空凳》成名，随即失业8个月！ 76岁夏韶声入行至今超过46年，今年8月2日、3日将会举行《夏韶声last Summer 演唱会2025》，夏韶声未正式当歌手前，在舞厅、酒廊当歌手，音乐造诣靠自己边做边学，他说：「音乐喺某层面上，有少少同行如敌国，就算而家都系、我嗰个年代如果呢间舞厅弹呢只歌，我哋只有靠耳仔尽听，用辧法自己学识，冇人教你。」 夏韶声玩音乐不是为兴趣而是揾食，有困难自己解决，加上出身艰苦，所以面对逆境仍永不放弃，1985年他参加亚太流行曲创作大赛，凭《空凳》夺得冠军但之后失业8个月，他说：「首歌赢咗应该风山水起先啱，但我做酒廊首歌叫《空凳》点请你？不过我哋呢代人挨得，呢口井冇水咪去第度掘啰。」 成长影响性格，夏韶声出身一个普通家庭，住在钻石山木屋区，从小就知生活不容易，很早便知道要为生活打拼，他说：「我曾经住过衙前围道，喺九龙城嗰边、成个家庭五个人，只系租人哋一间房连埋个厅，拉块布隔开两边，即系摆两张双人床，一家人就住喺嗰度，人哋行来行去都见到你，你点样挨得过呢种生活方式呢？你都会问自己：系咪要改变呢种生活方式？但系嗰阵时年纪细，亦都唔知点样先至叫改变，我好幸运，入咗音乐呢一行，一步一步去改变，起码父母嗰阵时嗰种苦况，我而家可以改善返一啲。」 夏韶声纵横乐坛迈向50年，有不少经典歌曲，而每首歌都是他的成长故事，当中灌录《交叉点》时，更是他最穷困的时候，裤袋只得七元，他说：「当年我去录音录《交叉点》嗰阵，为咗裤袋入面啲散银唔好嘈，我用只手压住袋口，捽实啲硬币，嗰阵时我慨「身家」就系咁多，我手上就得返七蚊，你话几咁穷困吖！你好难唱得出我嗰种咁凄凉慨感觉，所以《交叉点》呢首歌，真系一个经典。 」 「你问我点解咁辛苦？因为我哋又唔系咩大歌星，又唔系参加咩歌唱比赛出身，以前要建立知名度，差唔多系一日一日咁努力「储」返嚟，你慨成绩都系靠一份份工作攞返嚟，但未成名前，你都只系一个普通歌手，大家真系当唱歌系一份工，我都系当做一份工咁去做，一直做到今日，去到今时今日，我都仲系当渠系一份工，只不过而家你哋睇我，可能会觉得我系以一个歌星慨身份去唱歌，但其实呢个身份唔系我自己讲出嚟㗎，系你哋畀我。 」 除了《交叉点》外，《空凳》绝对是夏韶声最多人认识的作品，原来有机会唱这首歌，因为作曲人林敏怡有一天坐的士，听到收音机播《交叉点》，夏韶声说：「《空凳》作曲慨林敏仪，其实我唔识渠㗎，我识慨系林振强，渠哋有次坐的士听到《交叉点》，跟住就话：『点解呢个人可以唱啲歌唱得咁凄凉慨？』咁不如搵佢嚟唱啦，就系咁有《空凳》呢首歌出现，不过《空凳》赢咗之后，我就冇再唱酒廊，我唔系升咗级，而系因为《空凳》个歌名唔系咁好意头，所以「走廊」唔请我唱啦，我变咗「无业歌手」。 」 夏韶声有艺术家性格，对作品要求亦高，对歌词有一定执着，他曾经收到潘源良、林振强歌词后，因觉得未够完美，而要求修改，他说：「《永不放弃》潘源良填慨，我仲好记得，入面有一两句歌词，啲歌词太密唔好唱，我就有出声，我话：『你要改一改呢度』，渠就话：『如果我写得唔好，我就拆招牌。』我话我就拆你招牌，不过讲真，渠系写得好慨，只不过有几句真系唔啱唱，渠后尾都有改。」 「甚至连林振强都系，原本《结他低泣时》叫《死前一刻》，我话点唱出嚟呢？林振强系出名唔改歌词，渠畀你就系咁㗎喇，唔会再改，但渠为咗我，成首歌改哂，事实上喺嗰个年代，呢啲咁出名慨填词人，真系帮咗我好多，就算我个谂法有几好，我想写啲乜嘢，都要靠渠哋将意思变成歌词，好似我头先讲潘源良，《永不放弃》渠真系写得好，呢首歌除我用嚟鼓励自己之外，其实净系四个字永不放弃，已经鼓励咗好多人。」 夏韶声很记得每首歌的人和事，除了《交叉点》、《空凳》、《永不放弃》，他还记得拍摄《打错电话》MV时，与当时是导演的小美的经历，他说：「小美嗰阵时只系一个普通导演，连部灯光师都会虾渠，有次话喺铜锣湾夜晚拍MV，有个旧电话亭喺到，小美话：『不如摆条track喺度，镜头由远推埋去，咁咪好有feel啰』，推轨嗰啲就话：『呢个地下唔平㗎喎』 「小美，如果你而家睇到我呢段访问，其实妳同我都一齐挨过呢啲咁艰难慨时光，妳而家已经系一个出名经理人，但妳当年连自己拣个景都要谂好耐，叫灯光打灯，人哋都未必会听你讲，但我哋都撑过咗，喺呢个圈子入面，望返转头，我哋真系一齐经历咗好多，一齐克服咗好多难关，今日我提过慨每一位，我唔会碌你哋卡，但我真心觉得，你哋系同我一齐成长、一齐行过呢条崎岖路慨人。」
